في مجال أسكن عندكم ولو عالسقيفة ؟؟

مرحبا للجميع

أنا مشترك جديد بمنتداكم يلي مارح قول أنو حلو لأني ماقريت ولا موضوع فيه بس الواضح من اسمه ياعمري أنه مليئ بالحب ومتخم بالمحبة ومطفطف ود وحنان
تعرفت عالموقع عن طريق رفيق الي معروف كتير هون ومارح قول اسمه حتى يفوت هو شخصياً ويرحب فيني مع أني بعرف أنو مابيفوت لهون حسب ماقلي بس بدي جيبو لهون حتى نكسبه ونستمتع بقصصه وكلامه الحلو
هلأ أنا لسا جديد متل رغيف الخبز يلي طالع من الفرن وبدي حدا يمسك ايدي لأعرف غرف المنتدى وأهم شي السقيفة يلي بدي اسكن فيها لأني للأسف مارح أقدر فوت كتير لهون لأني مخفف فوتاتي عالمنتديات كتير بس بوعدكم أني رح كون خفيف نظيف كل قرن بفوت مرة حتى ماحدا يتدايق مني وبصير بطلطل عليكم من علِ يعني من السقيفة لشوف شو عم يصير
بطبعي مابحب احكي كتير لذلك باول فترة يمكن ماشارك أو ماعلق بمواضيع المشتركين هون بس رح حط كم موضوع خاص فيني بس حتى أتأقلم مع الجو هون وأتعرف منيح عليكم والأهم أنو ينقطع عرق الحيا ويتغير لون وشي يلي هلأ لونه أحمر متل لون البندورة الحورانية
أنا أسمي فريد من سوريا عايش بالشام أعزب عتيق جداً ( للمهتمات ) أصلع ودرويش وماحدا باس تمي غير أمي
بتمنى ترحبو فيني بليرة على الأقل حتى حط أول وأهجم